(نظم ”منبر افروزِ شبستانِ خطابت ہیں رشیدؔ“ نسیم امروہوی، قلمی نسخه، بشکریہ قسیم ابنِ نسیم امروہوی)

      ٭   پاکستان میں علّامہ رشید ترابی کا دورِ خطابت ۱۹۲۹ء سے شروع ہوتا ہے۔ پہلا عشرہ اُنھوں نے امام بارگاہ مارٹن روڈ پر پڑھا۔ رات کو وہ خراسان میں خطاب کرتے تھے ۔۱۹۵۱ء سے بزمِ حسینی سیّد حسن عسکری کے زیرِ اہتمام خالق دینا ہال کی مجالس بھی ہونے لگی۔ پاک محرّم ایسوسی ایشن کے زیر انتظام مجالسِ محرّم کا آغاز ۱۹۵۱ء سے جہانگیر پارک میں مولانا ابن حسن جار چوی کی تقاریر سے ہوا لیکن جب ۱۹۵۸ء میں مارشل لاء آیا تھا تو امن و امان کی صورتِ حال کے پیش نظر جہانگیر پارک کے اجتماعات پر پابندی لگادی گئی۔ چنانچہ یہ سالانہ مجالس بھی وہاں نہ ہوسکیں۔ ۱۹۵۹ء سے پاک محرم ایسوسی ایشن نے نشتر پارک کا انتخاب کرلیا اور مولا نا مرزا احمد عباس ذاکری کرنے لگے ۔ ۱۹۶۰ء اور۱۹۶۱ء میں مولانا ابنِ حسن نجفی نے تقاریر کیں۔ ۱۹۶۱ء سے نشتر پارک میں امحرّم سے ۲۰ ؍محرّم تک رات ساڑھے آٹھ بجے علّامہ رشید ترابی خطاب کرنے لگے۔ ۱۹۶۲ء میں اُنھوں نے شام کو خطاب کرنا شروع کر دیا اور رات کی مجالس ختم کر دی گئیں۔ علّامہ مرحوم نے پاکستان میں اپنے دورِ خطابت میں گیارہ برس نشتر پارک میں اور بائیس برس خالقدینا ہال کی مجالس سے خطاب کیا۔ یہ معلومات منور عباس ایڈو وکیٹ (پاک محرّم) اور عسکری صاحب ( بزمِ حسینی) سے حاصل ہوئیں۔

مولا نا ماہر القادری نے لکھا ہے کہ:

”نواب بہادر یار جنگ کی تقریر میں ایسا محسوس ہوتا جیسے بادل برس رہا ہے اور جناب رشید ترابی جب تقریر کرتے تو ایسا لگتا جیسے کوہِ آتش فشاں حرکت میں آگیا ہے۔ اُن کی تقریر و خطابت کے جو ہر پوری طرح پاکستان میں آکر کھلے۔ مجالسِ عزا میں بس انہی کا طوطی بولتا تھا۔ ادبی زبان میں جسے فضا پر چھا جانا کہتے ہیں، وہ چیز ان کو میسر آ گئی تھی۔ وہ جب تقریر کرتے تو مجمع ان کی مٹھی میں ہوتا۔ جہاں چاہارُ لایا اور جہاں چاہا دلوں کو گر ما دیا۔ اسی کا نام ”سحرِ خطابت“ ہے۔ راقم الحروف نے شیعہ مقررین میں علّامہ حائری ،مولاناسیّد سبطِ حسن، حکیم مرتضیٰ حسن، علّامہ کفایت حسین ، مولانا سیّدمحمد دہلوی، علّامه ابنِ حسن جارچوی، مولانا کبن صاحب لکھنوی اور مولا نا لقاء علی بدایونی کو سنا ہے۔ مدرستہ الواعظین کے پرنسپل مولانا سیّد سبطِ حسن تو خطابت و تقریر کے بادشاہ تھے۔ دوسرے مقررین کا کچھ ایک دوسرے سے ملتا جلتا انداز تھا مگر رشید ترابی مرحوم کی خطابت میں جو انفرادیت پائی جاتی تھی وہ انہی کا حصہ تھی۔ اپنی ذہانت سے نئے نئے موضوعات ایجاد کرتے اور اُن پر الفاظ و بیان اور استدلال کی عمارت کھڑی کر دیتے۔ مجھے یاد ہے کہ خالقد ینا ہال میں جواُن کے مواعظ ہر سال ماہِ محرّم کے شروع کے دس دنوں میں ہوتے تھے، ایک بار اُن کی تقریر کا عنوان ”حسینؑ اور اقتصادیات“ تھا۔ اس موضوع پر بولنا اور نبھانا بس اُنہی کا کام تھا۔ تقریر میں الفاظ کی وہ پُر جوش روانی جیسے بپھرا ہوا دریا اور مواج سمندر ! اس طوفان میں بعض اوقات اتنی دُور نکل جاتے کہ خود ہی چونک کر موضوع کی طرف واپس آتے۔“

(یادِ رفتگان: مولاناماہر القادری ، مشمولہ ماہنامہ فاران کراچی ۔ شمارہ مارچ ۱۹۷۴ء، ص ۳۱)

      علّامہ رشید ترابی کی خطابت میں انفرادیت کا سب سے اہم رخ موضوع کا انتخاب تھا۔ ان سے پہلے جو مقررین ، ذاکرین اور علماء گزرے ہیں، اُن کے یہاں یہ التزام و اہتمام نہیں ہوتا تھا۔

      بیسویں صدی میں فنِ مرثیہ گوئی اور فنِ خطابت میں بہت بڑی تبدیلی موضوعاتی رجحانات کے حوالے سے آئی۔ گزشتہ ابواب میں یہ تذکرہ کیا جاچکا ہے کہ نجم آفندی نے اپنے نوحوں اور دلورام کوثریؔ، جوشؔ ، جمیلؔ مظہری، اور نسیمؔ امروہوی نے مرثیہ نگاری کے سفر کو موضوعات کے دائروں میں آگے بڑھایا۔ فنِ خطابت میں اس انفرادیت کا پہلا قدم علّامہ رشید ترابی نے اُٹھایا۔

”انھوں نے آٹھ برس کی عمر میں ذاکری کی اور سولہ سال کی عمر ۱۹۶۳ء میں عنوان مقرر کر کے تقریر کرنا شروع کی۔“

( مضمون شعلہ بیاں خطیب اور ممتاز عالمِ دین علّامہ رشید ترابی مرحوم سیّد عبد القادر حسینی، مشمولہ روزنامہ جنگ کراچی اشاعت ۷ار دسمبر ۱۹۸۲ء، ص۳)

      انھوں نے کم و بیش نصف صدی ۱۹۲۴ء سے ۱۹۷۳ ء تک موضوع کو بنیاد بنا کر علومِ جدیدہ، قرآنِ حکیم اور احادیثِ نبویؐ سے استدلال قائم کر کے مجلس کو ایسی ایسی علمی وادبی درسگاہ میں بدل دیا جو ذہنِ جدید کی فکری تنگی کے لیے سبیلِ ہدایت کا فریضہ انجام دیتی تھی۔ ان کی چند اہم تقاریر کے موضوعات ہی سے اندازہ کیا جا سکتا ہے کہ وہ افکارِ ملّی ودِین کی تشریحِ نو میں کس وسعتِ فکر اور آفاقی شعور سے کام لے رہے تھے۔ اُن کی کچھ تقاریر کے موضوعات یہ ہیں:

”گیتان جلی اور نہج البلاغہ، قرآن اور شاعری ، اسلام اور سائنس، اسلام اور فنون لطیفہ، ادب اور مذہب ،اسلامی نظریۂ حیات، اسلام اور تصوف، انسان کا ارتقاء قرآن کی روشنی میں، اسلام اور ڈاکٹر اقبال، غالب اور مذہب، عقل اور قرآن، وحیِ ربّانی کا تعقّل، قرآن اور حقوقِ بشر، قرآن اور طنز و مزاح ، اسلام اور میرانیس، قرآن علم ہے، قرآن اور حیاتِ طیّبہ، توحید و شرک ، رسولِ اکرمؐ کی سوانح حیات کس طرح لکھی جائے۔“

(”منبر کا دوسرا نام“ : مرتّب امیر حسین ، مطبوعہ ۱۹۷۵ء کراچی ،ص ۲۶۵)

      ایجوکیشن فلاسفی آف اسلام کے عنوان سے اُن کی دس تقاریر بھی صاحبانِ علم میں بہت شہرت رکھتی ہیں۔ صبر ، رزق ، دُعا، سجدہ اور یقین کے موضوع پر اُن کی فکر انگیز تقاریر آج بھی لوگوں کے ذہنوں میں موجود ہیں۔ اپنے دولت کدے (فیڈرل بی ایریا) پر ماہِ رمضان المبارک میں تفسیرِ قرآن کے ذیل میں ایک ہی موضوع پر ایک ماہ تک مجلس سے خطاب کرتے۔ عربی، فارسی اور اُردو کی دُنیائے خطابت میں ایک ہی موضوع کا تعین کر کے اس تسلسل و تواتر سے علم و عرفان کی گتھیاں کھولنے میں آپ اپنی مثال تھے۔ بقول نسیمؔ امروہوی: