لیکن ترابی صاحب اِن تمام مرثیوں سے کوئی بند انتخاب نہیں کرتے بلکہ جلد ششم کا ایک مختصر مرثیہ اُن کے پیشِ نظر ہے جس کا مطلع ہے:

نیند آئے گی جب آپ کی بُو پاؤں گی بابا

میں رات کو مقتل میں چلی آؤں گی بابا

فرمایا نکلتی نہیں سیدانیاں باہر

چھاتی پہ سلائیں گی تمھیں رات کو مادر

وہ کہتی تھی سوئیں گے کہاں پھر علی اصغرؑ

فرماتے تھے بس ضد نہ کرو صدقے میں تم پر

شب ہوجائے گی اور دشت میں ہم ہوئیں گے بی بی

اصغرؑ مرے ساتھ آج وہیں سوئیں گے بی بی

وہ کہتی تھی کہ بس دیکھ لیا آپ کا بھی پیار

میں آپ سے بُولوں گی نہ اب یا شہِ ابرارؑ

اچھا نہ اگر جلد آنے کا کیجیے اقرار

مرجائے گی اِس شب کو تڑپ کر یہ دل افگار

کیسی ہیں یہ باتیں مِرا دل روتا ہے بابا

گھر چھوڑ کے جنگل میں کوئی سوتا ہے بابا

اصغرؑ کبھی ساتھ آپ کے اب تک نہیں سوئے

بہلا لیا امّاں نے اگر چونک کے روئے

شفقت تھی مجھی پر کہ یہ بے چین نہ ہوئے

یہ پیار ہو جس پر اُسے یوں ہاتھ سے کھوئے

جیتے رہیں فرزند کہ سب لختِ جگر ہیں

میں آپ کی بیٹی ہوں وہ امّاں کے پسر ہیں

لو روئو نہ اب صبر کرو باپ کی جانی

بھجوانا ہے عبّاسؑ کو کچھ پیغام زبانی

اُودے ہیں لبِ لال یہ ہے تشنہ دہانی

ملتا ہے تو بی بی کے لیے لاتے ہیں پانی

محبوبِ الٰہی کے نواسے ہیں سکینہؑ

ہم بھی تو کئی روز کے پیاسے ہیں سکینہؑ