ڈاکٹر عالیہ امام راوی ہیں کہ جب علامہ رشید ترابی سے یہ پوچھا گیا کہ آپ میں اور ہم عصر دوسرے مقررین  میں کیا فرق ہے؟ تو انھوں نے کہا تھا، فرق صرف اتنا ہے کہ ایک منبر کو زینت دیتا ہے، دوسرے کو منبر زینت بخشتا ہے۔ کسی صاحب فن کی طرف سے اپنے بارے میں اس طرح کی رائے کوئی خاص بات نہیں۔ ارباب فن میں تعلّی اور خودستائی کا پایا جانا بالکل معمول ہے۔ لیکن ان میں سے چند ہی ہوتے ہیں جن کا فرمایا ہوا حقیقتاً مستند ہوتا ہے اور جن کی صریرِ خامہ سچ مچ نوائے سروش ہوتی ہے۔ ترابی صاحب کا قول بھی اسی نوعیت کا اظہار، حقیقت اور خود شناسی پر مبنی جملہ ہے۔ انھوں نے حقیقتاً خطابت کو زینت دی۔ اُن کا زمانۂ خطابت ان ہی کا دورِ خطابت تھا۔ اُن کی منفرد حیثیت کا اندازہ اس بات سے ہو سکتا ہے کہ اگر چہ وہ اپنے زمانے کے تنہا بڑے خطیب نہیں تھے، مجلسوں کی خطابت کبھی عظمتوں سے تہی داماں نہیں رہی۔ ہر زمانے میں کچھ بڑے مقررین ضرور موجود رہے، لیکن اُس عہد سے آج تک جب بھی نمایاں خطیبوں کی بات ہوتی ہے تو تمام قابلِ قدر قابلِ فخر ذاکرین کے اسمائے گرامی ایک ساتھ لیے جاتے ہیں، اُن میں رشید ترابی شامل نہیں ہوتے اور جب رشید ترابی کا نام لیا جاتا ہے تو وہ تمام یقینی طور پر بڑے نام الگ رکھے جاتے ہیں۔ اُس وقت صرف ترابی صاحب کا ذکر ہوتا ہے۔

      خطابت کے حُسن و کمال کا سب سے بڑا پیمانہ اُس کی مقبولیت اور پزیرائی ہے۔ اس حوالے سے ترابی صاحب دنیائے شہرت وناموری کے بے تاج حکمران تھے، لیکن ترابی صاحب کی انفرادیت کا تعلق اس بات سے نہیں کہ وہ اپنے عہد کے مقبول ترین خطیب تھے۔ مقبولیت اُن کا کمال نہیں تھی۔ اُن کا کمال اُن کا فن تھا۔ مقبولیت اس کمال کا نتیجہ تھی ۔ غور طلب بلکہ تحقیق طلب بات یہ ہے کہ اُن کے فن کی وہ کیا خصوصیات تھیں جن کی موجودگی نے اُن کے فن کو کمال شہرت و مقبولیت تک پہنچایا۔

      ترابی صاحب کے پاس وہ تمام خام مال وافر مقدار میں موجود تھا، جس کی مدد سے خطابت اور اچھی خطابت ہو سکتی ہے۔ خداداد صلاحیتوں میں ذہانت، موزوں آواز اور اچھا حافظہ ایک کامیاب خطیب کے لیے انتہائی ضروری عوامل ہیں۔ یہ تینوں نعمتیں انہیں وافر حاصل تھیں ۔ اکتسابی طور پر وہ ایک صاحب نظر عالم تھے۔ ان کا مطالعہ نہ یک رخا تھا نہ محدود ۔ انھوں نے بالکل مختلف جہتوں سے تعلق رکھنے والے علوم پر یکساں توجّہ دی تھی۔ مشرق اور اس کے علوم تو اُن کی میراث تھے ہی، مغربی افکار سے واقفیت بھی کما حقہٗ تھی۔ پھر اُن کے سامنے اپنے عہد کے اعلیٰ ترین خطابت کے نمونے بھی موجود تھے۔ ان کا زمانہ وہ ہے جب سیاست اور مذہب کے میدانوں میں سربلندی اور کامیابی کے لیے خطابت ایک لازمی شرط کی حیثیت رکھتی تھی….. ایک اور صفت جو ہر میدان میں کامیابی کے لیے ہمیشہ ضروری رہی ہے، وہ جذبۂ محنت ہے۔ اتفاقی بڑائیاں حادثے کے طور پر حاصل تو ہو جاتی ہیں لیکن دیر پا کبھی نہیں ہوتیں۔ تاریخ کا حصّہ بن جانے والے کارنامے اپنی پشت پر لگاتار محنت کا سہارا رکھتے ہیں ۔ ترابی صاحب محنتی بھی کافی تھے۔ اور ان کی محنت مسلسل تھی….. اچھی خطابت شعر و ادب کی چاشنی سے مزین ہوتی ہے۔ ترابی صاحب کو ایک بہت اعلیٰ درجہ کا ادبی ماحول ملا۔ چنانچہ ان کا شعر وادب کا ذوق اور آگہی بھی وہ سرمایہ تھی جو اُن کے فن کو چار چاند لگانے میں مددگار ثابت ہو سکتی تھی … یہ تمام عناصر کسی بھی بلند پایہ خطابت کی ضرورت ہیں۔ ترابی صاحب کا فن اور کمال فن ان ہی عناصر سے وجود میں آیا ہے، لیکن یہ فن محض ان عناصر کے ایک جگہ جمع ہو جانے سے ہی وجود میں نہیں آجاتا، بلکہ ان سب کو انتہائی چابک دستی، سمجھداری، ہنرمندی اور تناسب و توازن سے استعمال کرنے سے وجود میں آتا ہے اور یہیں سے ترابی صاحب کا فن شروع ہوتا ہے۔

      ترابی صاحب کے اپنے زمانے میں بھی اور ان سے پہلے بھی، خطابت کی تمام تر خوبی مفاہیم کے ابلاغ میں تھی۔ بڑا خطیب وہی تھا جو زیادہ سے زیادہ لوگوں تک اپنے بلند افکار کو پہنچا سکتا ہو۔ چنانچہ خطابت، روز مرہ کی مثالوں، واقعات اور تشبیہات سے خود کو اس سطح پر لاتی تھی جو سامعین کی بڑی سے بڑی تعداد کو مسئلے کے تمام پہلوؤں سے آگاہ کر سکے۔ ترابی صاحب نے سب سے بڑا انقلابی اقدام یہ کیا کہ مقصدِ خطابت کو یکسر بدل ڈالا۔ یہ کہنا دشوار ہے کہ ان کے اس فیصلے کے محرکات کیا تھے۔ لیکن یہ ایک نا قابلِ تردید حقیقت ہے کہ ترابی صاحب تقریر بات سمجھانے کے لیے نہیں کرتے تھے۔ اُن کی خطابت کا مجموعی تاثر ابلاغ کی بجائے مرعوبیت تھا۔ سامع کو مرعوب کرنا خطابت کے اثرات میں ایک جزو کی حیثیت سے ہمیشہ شامل رہا ہے۔ لیکن ترابی صاحب نے اس جزو کو جزو سے کل بنا دیا۔ اس مقصد کے حصول کے لیے ان کے سرمایۂ صلاحیت میں ہر کار آمد عنصر موجود تھا۔ وسعتِ معلومات، غیر معمولی حافظہ، لہجے کا تیقّن ، ثقیل اور غیر عوامی زبان، مختلف علوم کی خصوصی اصطلاحوں کا ذخیرہ اور ان سب پر بھاری ان عناصر کا انتہائی ذہانت سے استعمال ۔ نتیجہ یہ ہوتا کہ اُن کا سامع تقریر سے زیادہ، مقرر کے سحر میں مسحور ہو جاتا۔ مجمع منتشر ہوتا تو اس احساس کے ساتھ نہیں کہ خطیب نے کیا عمدہ بات کہی ہے۔ بلکہ احساس یہ ہوتا ‘ ”کیا زبر دست خطیب ہے۔“، ”کتنا بڑا عالم ہے۔“، ” کیا لا جواب حافظہ ہے۔“ ترابی صاحب کو سمجھنا حسبِ توفیق چند ہی لوگوں کو میسر آتا، لیکن ایک ہیبت اور حیرت کا احساس ہر سامع کی یکساں اور مشترکہ ملکیت ہوتی ۔

      ترابی صاحب کے اس مقررانہ اجتہاد کا جواز بھی تھا اور اسی میں ان کی مقبولیت کا راز بھی پوشیدہ تھا۔ جواز تو یہ تھا کہ فکر و خیال میں جتنی بلندی آتی جاتی ہے، اسی تناسب سے ابلاغ میں ( یہ اعتبار تعدادِ سامعین ) کمی ہوتی جاتی ہے۔ ہر صاحب فکر و نظر عالم کی طرح ترابی صاحب اس حقیقت سے پوری طرح آگاہ تھے کہ ان کو جس قد رسنا جاتا ہے اس کے مقابلے میں سمجھا بہت کم جاتا ہے ایسی صورت میں دو تین رائج الوقت امکانات تھے۔ ایک طریقہ تو یہ کہ مقرر عوام کی پسند کو معیار سمجھ لے اور روز بروز اپنی سطح سے نیچے آتا جائے۔ یہ ترابی صاحب تو کیا کسی بھی معقول شخصیت کے لیے قابلِ قبول حل نہیں تھا۔ پھر یہ کیا جائے کہ خطابت کو کچھ عام فہم موضوعات تک محدود کر لیا جائے اور ان موضوعات کی حد تک افکار کو مثالوں، تشبیہوں وغیرہ کی مدد سے زیادہ سے زیادہ لائقِ ابلاغ بنا لیا جائے۔ عموما علماء اور دانشوروں کا یہی طریقہ رہا۔ اور جہاں تک اُن کے حقیقی علم و تحقیق کا تعلق تھا، وہ یا تو کوئی اور ذریعہ اظہار ( مثلاً تحریر ) تلاش کرتا یا رفتہ رفتہ بے تو جہی کا نشانہ بن کردم تو ڑ دیتا۔ ایک اور صورت تھی کہ اپنے مقام پر برقرار رہنے پر اصرار کیا جائے۔ ایسی صورت میں جیسے جیسے فکر و علم میں گہرائی اور گیرائی آتی جاتی ، حلقہ سماعت و فہم محدود سے محدود تر ہوتا جاتا تر ابی صاحب کے لئے ان تمام صورتوں میں سے کوئی صورت بھی قابل قبول نہیں تھی۔ نہ وہ اپنے مقام سے نیچے آنے کے لئے تیار تھے، نہ عددی حوالے سے اپنی مقبولیت پر حرف آنے دینا چاہتے تھے۔ اب یہ تو طے شدہ بات تھی کہ سادہ ترین بات بھی جب ایک ملے جلے مجمعے تک یکساں طور پر نہیں پہنچ پاتی تو تر ابی صاحب جیسی نابغہ روزگار شخصیت کے نو بہ نو افکار ہر ذہنی اور فکری سطح کے حامل اجتماع تک کیسے منتقل ہو سکتے تھے۔ چنانچہ انھوں نے گویا طے کر لیا کہ وہ اپنے بیان کو اپنے فکر کی سطح سے نیچے نہیں آنے دیں گے۔ البتہ وہ اپنے ہزاروں سامعین کو مایوس بھی نہیں کریں گے ۔ وہ اگر علم و آگہی نہیں لے جا سکتے نہ سہی، لیکن خالی ہاتھ بھی نہیں جائیں گے۔ وہ یہ احساس لے کر جائیں گے کہ انھوں نے ابھی ابھی ایک حیرت انگیز انسان دیکھا ہے۔ ایک عجوبہ روزگار شخصیت کی زیارت کی ہے۔ حیرت زدہ ہو جانا بھی تو باعثِ تسکین ہوتا ہے۔ ہر طبقے سے تعلق رکھنے والے اپنے بے شمار سامعین میں سے ہر ایک کو کچھ دے کر رخصت کرنا، یہی وہ بنیادی نکتہ تھا جس نے ترابی صاحب جیسی مشکل پسند شخصیت کو اپنے عہد کا مقبول ترین خطیب بنا دیا۔

      ترابی صاحب کی معرکۃ الآرا تقاریر کا پورے غور و توجّہ سے معروضی جائزہ لیا جائے تو اندازہ ہوتا ہے کہ وہ اپنے حیرت زدگی اور مرعوبیت کے مقاصد کے حصول کے لئے خصوصی اہتمام کرتے تھے۔ اور اس اہتمام کے لیے نہ تو ان کے پاس ساز و سامان کی کمی تھی، نہ سلیقے اور ہنر مندی کی ۔ ان کی خطابت میں موضوع، مواد اور اُسے پیش کرنے کے طریقوں میں اتنا تنوع تھا کہ اُن کی تقاریر کوکسی بندھے ٹکے فارمولے میں نہیں سمویا جا سکتا۔ پھر بھی بہت سی تقاریر کو سامنے رکھتے ہوئے کچھ نمایاں خصوصیات کا تعین ہو سکتا ہے۔

      اُن کا ایک دلچسپ انداز یہ تھا کہ وہ کسی معروف بات کو بیان کرتے ہوئے، عین اُس وقت جب سامع یہ توقع کر رہا ہوتا تھا کہ اب وہ فلاں چیز کا ذکر کریں گے، یا فلاں بات کریں گے، اچانک ایسی بات کہہ دیتے جس کا گمان نہ ہوتا۔ اُنھوں نے امیر المؤمنین علیؑ ابنِ ابی طالبؑ کے اُس خط کا انگریزی زبان میں ترجمہ کیا جو انھوں نے اپنے گورنر مالک ابن اشتر نخعیؓ کی تقرری کے وقت مرکزی حکومت کے ہدایت نامے کے طور پر جاری فرمایا تھا۔ یہ خط بہت معروف ہے ۔ اور سب ہی واقف ہیں کہ پورا خط نہج البلاغہ میں موجود ہے۔ اب اس خط کا حوالہ دینا ہو تو ہر شخص تو قع کرے گا کہ نہج البلاغہ ہی کا نام لیا جائے گا، لیکن ترابی صاحب اس خط کا تعارف یوں کراتے ہیں:

      ”میں نے ذیل میں حضرت علیؑ کے اُس مشہور خط کا عربی سے انگریزی زبان میں ترجمہ پیش کیا ہے جو اُنھوں نے اس وقت کے مصر کے گورنر مالکِ اشتر کو خلیفہ کی جانب سے ہدایات کے طور پر لکھا تھا۔ فہرستِ طوسی (صفحہ ۳۳ ) کے مطابق اس خط کی پہلی نقل، حضرت علیؑ کے اپنے دور میں اصبغ ابن نباتہؓ نے کی تھی۔ اس کے بعد متعدد عرب اور مصری علماء اُس خط کو درج کرتے رہے۔ ان میں سرِ فہرست نصر ابنِ مزاحم ( ۱۴۸ ھ) جاحظ بصری (۲۵۵ھ ) سیّد رضی (۴۰۴ھ )، ابنِ ابی الحدید (۶۵۵ ھ ) اور مصر کے مصلح ابنِ عبدہٗ اور دورِ حاضر کے عظیم دانشور علّامہ مصطفےٰ بک نجیب شامل ہیں ۔“

      اب ملاحظہ فرمائیے کہ جس حوالے کی سب سے زیادہ توقع تھی، یعنی نہج البلاغہ، اس کا نام بالکل نہیں لیا گیا۔ نہج البلاغہ کے مرتّب سیّد رضی کا نام ضمناً آ گیا۔ لیکن اس دوران ہر وہ شخص جو سمجھتا تھا کہ وہ اس خط سے اچھی طرح واقف ہے، یہ ماننے پر مجبور ہو گیا کہ وہ ترابی صاحب کے مقابلے میں بے خبرِ محض تھا۔

      مندرجہ بالا حوالہ علّامہ کی ایک تحریر سے لیا گیا ہے، لیکن اُن کی تقریر میں بھی یہی رنگ غالب تھا۔ اس خط کا حوالہ دیتے ہوئے انھوں نے اپنی وسعتِ نظر کا گہرا تاثر چھوڑا تھا، کبھی یہی کام وہ اپنے حافظے کی صلاحیت سے لیتے۔ آہستہ آہستہ دھیمے دھیمے لہجے میں بات شروع ہوتی ، پھر کوئی خاص تذکرہ شروع ہوتا، غیر محسوس انداز میں اُن کا حافظہ اپنے جوہر دکھانا شروع کرتا، اُن کے بیان کی روانی بڑھتی جاتی ، کچھ دیر بعد سامع حیران ہونا شروع کرتا، ایک سنّاٹا طاری ہو جاتا، سانس رک جاتی ، اور جب تک بات اپنے نقطۂ کمال تک پہنچتی ، موضوعِ بیان سے قطع نظر، سامع صرف حافظے کی بے پناہ قوت کے سامنے گھٹنے ٹیک چکا ہوتا۔ اپریل ۱۹۷۰ء میں ماہِ محرّم کے تیسرے عشرے کی مجالس ترابی صاحب امام بارگاہ رضویہ میں پڑھ رہے تھے۔ اُن دنوں آیۃ اللہ العظمیٰ سیّد محسن حکیم طباطبائی مرحوم کے فرزند آقائے مہدی حکیم پاکستان تشریف لائے تھے ۔ ۲۹ ؍محرّم کی مجلس میں انھوں نے بھی شرکت کی۔ ترابی صاحب نے معزز مہمان کا منبر سے تعارف کرایا۔ طبا طبائی سادات کے متعلق چند جملے کہے۔ پھر کہا، میں ایک حدیث بیان کرنا چاہتا ہوں، پھر بڑے غیر محسوس انداز میں، آقائے محسن حکیم کے سلسلۂ اجازۂ روایتِ حدیث کا بیان شروع کیا :