جانِ تکلّم
رئیسؔ امروہوی
وہ موجِ نطق جوشِ تلاطم کہیں جسے
ایسا کلیم جانِ تکلّم کہیں جسے
ایسا خطیب جس پہ خطابت ہو خود نثار
ایسا ادیب جس پہ ادب کو ہے افتخار
ایسا سخن طراز کہ خود موجدِ سخن
ایسا نوا نواز کہ اِک شاہکار فن
منبر نشیں کہ زینتِ محراب جس کی ذات
مجلس فرازِ علم، تفکّر کی کائنات
وہ ذاکرِ رموزِ شہادت بصد بیاں
الہامِ نطق جس کا بیان ہو خوش بیاں
اتمامِ ذکر و خطبہ و فن کاری و ہنر
علّامۂ رشید ترابی کی ذات پر
وہ تھا رئیس فاتحِ دروازۂ عمل
آواز اُس کی آج بھی آوازۂ عمل